Útivist og umhverfi

Möguleikar til útivistar eru fjölbreyttir í Seyðisfirði og yrir þá sem hafa áhuga á göngum má finna bæði stuttar og lengri gönguleiðir í firðinum.
Leikvöllur fyri yngstu kynslóðina má finna miðsvæðis í bænum auk strandblakvallar og  sparkvallar. Folfvöllur er staðsettur rétt innan við innstu hús bæjarins og 9 holu golfvöll má einnig finna á Seyðisfirði. Hægt er að leigja kayak við Lónið yfir sumartímann og eins er boðið upp á siglingar um fjörðinn og yfir í nærliggjandi firði.
Skíðaáhugamenn finna gott skíðasvæði í Stafdal, sem er einungis í 10 mínútna akstursfjarlægð frá Seyðisfirði.

Menning og listir

Seyðisfjörður er ekki síst rómaður fyrir sitt fjölskrúðuga menningarlíf og verður enginn svikinn af því að upplifa menningu, viðburði og mannlíf Seyðisfjarðar.

Mikil áhersla hefur verið lögð á að tengja móttöku ferðamanna sögunni, menningu og listum. Miðstöð þessarar starfsemi er í Menningarmiðstöðinni Skaftfelli. Þar er jafnframt til húsa glæsilegur myndlistarsalur. Alþjóðlegar jafnt sem innlendar myndlistarsýningar prýða þar sali flesta daga ársins. Auk þess eru í húsinu [email protected], Bistro og vinnustofa listamanna.

Tækniminjasafn Austurlands fjallar um sögu Íslands með áherslu á tæknivæðingu landsins frá um 1880 til dagsins í dag. Sýndir eru m.a. munir, minjar, hús, myndir og verkferlar.

LungA, listahátíð ungs fólks, er haldin á Seyðisfirði í júlí ár hvert. Á dagskrá eru fjölbreyttar listasmiðjur sem starfræktar eru frá þriðjudegi til laugardags, fjölbreyttir viðburðir, s.s. tónleikar, uppskeruhátíð smiðjanna, myndlistarsýningar, leiksýningar og fleira og fleira.